韓國收費台tvN嘅王牌節目《一日三餐》，上月開始播出最新一季「大海牧場篇」，今季除咗係上季原班人馬Eric、李瑞鎮、尹鈞相演出外，更特別邀請其他藝人擔任嘉賓，繼韓劇《屋塔房王世子》女星韓智敏、韓劇《Signal》男星李帝勳任嘉賓後，節目噚晚預告新嘉賓係女團AOA人氣成員雪炫。

預告中可見Eric、李瑞鎮、尹鈞相三人正喺得糧島嘅屋企休息時，雪炫突然素鏡現身嚇親三人，不過尹鈞相見到雪炫雙手捧住好重嘅行李時，就立即衝去落手拎，相當有風度。而三兄弟中嘅大哥李瑞鎮現年已經46歲，同22歲嘅雪炫足足相差24年，雪炫提到自己生肖屬狗時，身旁嘅尹鈞相就笑言：「原來兩人(李瑞鎮及雪炫)嘅歲數剛好差兩輪啊。」引起工作人員大笑。預告中又見雪炫與尹鈞相嘅兩隻寵物貓親密互動，同時雪炫親自為三位Oppa下廚烤肉。

另外，於噚晚播出嘅新一集《一日三餐》中，仲係單身嘅李瑞鎮就向李帝勳提到自己對愛情嘅睇法。李瑞鎮先大讚Eric為人浪漫，及後直言覺得戀愛嘅過程好煩，並稱自己鍾意一個人嘅環境，甚至勸李帝勳都試下單身生活，相當搞笑。