【新增內容及圖片】
韓版《步步驚心》兩位主角李準基同IU先後襲台，噚日IU先襲台，準備今晚嘅演唱會，今日就到李準基襲台。

由於李準基已有七年冇嚟台灣，所以佢今日上午一抵台灣即時引來逾300粉絲接機，當中仲包括20名來自香港嘅粉絲。今次係李準基第四次來台，聽晚就會喺台北國際會議中心舉行演唱會。而李準基抵步後，喺工作人員陪同下率先下機，粉絲即時一湧而上，李準基都好親民，不時同粉絲對話，又主動向粉絲及傳媒大擺心心手勢及獻飛吻，親民爆燈，同時又以中文講：「好高興來到台灣」、「好久不見」。

李準基搭車準備離開時，一名女粉絲不慎跌倒，李準基亦都立刻停下腳步，等工作人員將佢扶起，之後先搭車離去。

而抵台後，李準基即現身記者會，佢得知IU今晚開騷後即用中文為對方打氣：「祝IU今天晚上的演出餘音繞樑，黃鶯出谷，高朋滿座。」同時又讚IU為最棒嘅藝人，又話：「希望大家同IU共度美好嘅時光，知恩(IU嘅本名)，好快就見囉！」當時已預告合體。

而IU今晚於新莊體育館開唱時，就吸引3,500名粉絲撐場，當IU唱完《三寸天堂》後，李準基就驚喜登場，仲穿上劇中嘅斗篷登場，重現為IU擋雨嘅經典畫面。

另外，韓國女團GFriend亦都於今日襲台，出席台視《2017超級巨星紅白藝能大賞》活動，佢哋今早同李準基抵台，李準基先出閘，10分鐘後就到GFriend現身，現場有唔少男粉絲接機，但因為佢哋要趕住綵排，所以GFriend即急急腳走人，其間一名韓籍保鑣更不斷推現場記者同粉絲，一度造成混亂，成員都因而受驚