早前自揭曾被性侵犯嘅麥明詩，今日着咗件斜膊上衣襯牛仔褲到天水圍出席剪接夢工場活動，席上，佢同一班女粉絲大玩遊戲。

聽日係佢26歲生日，麥明詩透露會同家人及朋友慶祝，佢話：「我收到唔少祝福，早幾日都已經切蛋糕，我希望食肥啲，因為近排瘦咗好多，因為箍牙、拍劇冇瞓覺，同埋呢個禮拜有好大心理壓力，壓力係嚟自工作同新聞，所以今年生日都幾大感觸。」

自從麥明詩公開曾被性侵犯（新聞連結： http://bit.ly/2AL0zrK ），引起坊間好大迴響，有人覺得佢唔應該公開，甚至質疑佢公開嘅用意，問佢有冇後悔？麥明詩坦承公開後有壓力：「都有壓力，我唔覺得為某啲原因去掩飾自己嘅過去，做藝人係要以最赤裸嘅面目見人，我唔覺得好羞恥；另外，係有好多聲音同唔同嘅意見，我會諗我講嘢而全世界都認同，咁我講嘢唔係對大家一個衝擊，我係想透過大家唔同睇法，大家去體會唔同人嘅諗法，如果大家都認同就唔係一個改變。」前男友林作嘅媽媽係咪曾經叫佢唔好公開？麥明詩表示曾跟對方傾偈，但實質內容已經唔記得。

另外，對於有報道指麥明詩拍劇時，疑得罪一線阿姐( 新聞連結： http://bit.ly/2iK1GNX )，麥明詩話：「我嘅弱點比較內斂，好靜同怕醜，成日都發呆，因為我怕麻煩到人，又唔會主動周圍同人吹水，可能我鍾意私人空間，所以我都尊重人哋嘅私人空間，我覺得人哋讀緊劇本、畫緊眼線未必係最適合、方便同人傾偈，但我會嘗試去揣測緊點樣可以達到一個最好嘅平衡，唔會阻到人哋，又唔會覺得我好冷淡。」有冇人同佢面阻阻？佢話：「我諗大家唔會咁出面啩，我都多謝佢有反映呢件事，等我注視番自己嘅弱點。」

聖誕節快到，會唔會同媽媽去旅行？麥明詩話：「我有朋友喺歐洲結婚，到時我都會去，順便玩吓。」

更多娛聞，喺晒《娛果》
http://fb.com/appledailyent