上季尾不獲練馬師文家良續主帥約的巫斯義，對香港賽馬念念不忘，呢個星期日（20日）可以回歸策騎，因為獲「壯思飛」馬主賴偉智聘請，出爭馬會一哩錦標，呢場係國際二級賽，根據馬會規例，馬主有權聘請海外騎師來港策騎名下馬。
巫斯義年近半百，可以話係香港紮根，喺香港騎咗十幾廿年，同馬主關係好，所以唔少馬主知道他回來，即提供座騎，巫斯義周日唔止騎「壯思飛」，仲有同主隻「三思飛駒」，其他座騎還有「一片光明」及昔日騎過的「福勵」、「包裝鬥士」。
「福勵」馬主鄭永安就係巫斯義好友，他的「福」系馬早於十多年前已全力倚重巫斯義，如「福智」一出即爆45倍，「福慧」、「福譽」各由其經手贏過，「福毅」一騎即上名，「福勵」以往巫斯義一騎就打叠兩場上名，今次跑2000米人馬曾合作同程入Q，有根有據，難得好友支持，難怪隻馬評122磅巫斯義都要騎。