樂視香港日前入稟法院申請自行清盤，雖然有唔少網民擔心樂視體育（LeSports）受到影響，擔心到時冇得睇波，不過樂視體育發聲明，稱其實係兩間公司嚟嘅，清盤唔會對樂視體育造成影響。(新聞連結： http://bit.ly/2l0ea4W )

蕭定一旗下嘅HMVOD，原來噚晚喺佢哋fb專頁出咗條為「樂視苦主」推出轉會優惠嘅片，搵趙永洪做的士司機，咩事呢？話說佢喺等客嗰陣，同啲行家吹水，話裝咗樂視個plan，點知睇睇吓就再睇唔到。

之後鏡頭throwback返趙永洪啱啱申請樂視嘅情景，原來當日佢喺條街遇到做推銷嘅雨僑，雨僑特登被安排講廣東話唔正，明寸樂視紅色背景。

故事跟住就講趙永洪俾雨僑嘅美色所迷而簽咗約，喺佢吐完一大輪夾雜住粗口同俗語嘅苦水之後，突然間打扮成個關公嘅王宗堯喺上咗的士，之後就介紹咗呢個plan。

雖然有人覺得呢個舉動勁抽水，不過亦有網民覺得總算補償返啲損失，同時亦有覺得條片好貼地兼抵死。扮關公拯救苦主嘅王宗堯，原來喺現實生活中，佢都裝咗樂視！

王宗堯今日接受《蘋果》訪問，佢話：「我之前都裝咗樂視，簽咗兩年約，點知睇咗半年左右，睇睇吓突然間乜嘢都冇得睇，我仲以為大間公司，又有背景，點會死呀，真係O晒嘴！」講到今次拍呢條片，王宗堯話：「我哋都係早兩日先拍，呢個安排都好好，可以幫吓嗰啲苦主！」

喺《降魔的》做完的士司機，依家又做的士司機嘅趙永洪就向傳媒表示，「接收樂視客戶」廣告嗰啲粗口對白，全部都係出自佢本人手筆：「呢個真係好橋，直接幫到人，又可以吸納啲新客！」咁佢又有冇試過中招呢？「我試過打電話去啲網絡公司諗住想取消，但係跟住指示撳咗十幾分鐘，都聯絡唔到嗰啲客戶服務員，反而撳去申請服務，好快有人接電話，嗰陣真係好忟！」

至於身在日本嘅老闆蕭定一最初就話冇回應，未幾再話：「樂視苦主有救，冬至真快樂！」

更多娛聞，喺晒《娛果》
http://fb.com/appledailyent