【Bosco「攝位」】同曾國祥感情有變?王敏奕當街爆喊「唔好打俾佢」
黃宗澤bosco曾國祥王敏奕
25歲王敏奕同曾國祥拍拖3年幾,連曾志偉都認定佢係半個新抱仔,佢哋不時人前晒恩愛,有時間就結伴外遊,拍拖半年就同居,今日有周刊指37歲曾國祥主力喺台灣發展,佢哋聚少離多,令喺單親家庭長大嘅王敏奕冇咩安全感,同時有一顆想嫁嘅心,據知曾國祥目前專注事業,所以暫時唔想結婚住。
王敏奕上周三被影到同糖妹、陳瀅一齊去咗Bosco(黃宗澤)間蠔吧,當晚王敏奕飲得幾醉,報道又指王敏奕喺街邊睇電話一邊爆喊,未知係唔係昔日同曾國祥糖黐豆,o依家見面少咗,感情有變,搵好姊妹訴苦,喺上車前,王敏奕又忽然大叫唔好打俾佢,又話唔好搵佢,似乎口中講嘅「佢」就係男友曾國祥噃!最離奇就係當日Bosco原來都在場,佢喺三女落樓準備上車時,Bosco箭步落樓梯,直上七人車,完全冇睇吓醉爆嘅王敏奕,話晒佢哋之前一齊拍網劇《飛虎極戰》,喺劇中做情侶,日夜都見住,而王敏奕同Bosco喺片場都幾好傾,更有傳佢哋一杯嘢兩份飲,Bosco成日講笑o氹王敏奕笑,Bosco「攝位」追王敏奕,不過o依家拍完劇,Bosco同王敏奕又冇咩交流,似乎冇咩愛火囉!
此外,報道又爆曾同男友同居嘅王敏奕,目前返咗柴灣公屋,同家人一齊住,唔知係咪趁男友唔喺香港多啲陪家人,事後,周刊都有問王敏奕,佢就話感情ok,暫時二人未諗結婚,但係雙方家長都見過,又漏口風話身邊好多朋友結婚,唔通想曾國祥快啲行動。
近年曾志偉大仔曾國祥喺台灣發展,同女友王敏奕相處時間唔多。
有傳王敏奕同Bosco開工,二人不時喺片場玩得好埋。
王敏奕拍網劇《飛虎極戰》嗰陣,好姊妹糖妹同陳瀅都有去探班。