雷蛇（1377）創辦人兼行政總裁陳民亮經常喺網上同fans交流，唔少網民忽發奇想嘅產品，陳民亮都幫fans一一實現，最近雷蛇宣佈，繼家電產品之後再撈過界，推電競能量飲品。

雷蛇話，發現遊戲社區內有幾位活躍成員向Razer提出訴求，希望公司考慮推出專為遊戲玩家而設嘅能量飲品。之後團隊進行測試並評估了所有市場上能量飲品同配方，最終推出RAZER RESPAWN，採用綠茶提取物、膽鹼、維他命B同95mg咖啡因等成分設計，話有助於增加專注力、反應時間和精神耐力咁話。

早喺2013年9月，一班fans發起咗「Give us the Razer Toaster」，仲建議公司整個Razer Toaster（雷蛇多士爐）。點知陳民亮相當認真，仲話只要有100萬個like，或者fans將RAZER個logo紋喺身影相，一張相就可以當10萬個like，就會將Razer Toaster變為正式商品，結果目標輕鬆達成，陳民亮更加話會成立專屬團隊，設計同生產Razer Toaster。之後更加話，只要個人專頁夠1萬個「like」，就會推夾公仔機咁話。

RAZER RESPAWN一盒20包賣24.99美元，即係200蚊左右，暫時美國先有得賣，唔知香港幾時會出？