又到聖誕、又到聖誕，想揀番份聖誕禮物畀親朋戚友，唔希望買得太貴兼想有啲特色嘅，不妨去立法會嘅紀念品售賣部揀吓，事關佢哋推出聖誕大優惠，減得最多嘅甚至係6折發售，話唔定可揀到實用夾特別嘅嘢！

想買啲實用嘅嘢，可以考慮買文具，雖然袖珍水晶原子筆，連禮盒套裝都係80蚊，而仿皮筆袋更由原價20蚊減到10蚊，以立法會新舊大樓、新舊會議廳做背景嘅明信片，就由70蚊減到50，有立法會大樓外觀做圖案嘅木盒，都只係減到100蚊咋！

如果係買畀小朋友，亦可以選擇益智嘅玩具，例如以立法機關價值理念做主題嘅立體砌圖，由原價100蚊減到60，再唔係可以考慮買本印有教育遊戲嘅「建立我們喜愛的社區」筆記簿，都只係25蚊。