港府嘅武肺全民檢測進行得如火如荼，唔少市民都話擔心醫護採樣手勢唔好，會整傷鼻腔或者咽喉。不過所謂藝高人膽大，做實驗隨時多過食飯嘅港大微生學系講座教授袁國勇，今日就當住一眾傳媒表演自採鼻腔同咽喉樣本，一旁嘅行會成員林正財仲爆料話袁曾經幫自己抽血，相當佩服咁話喎！

袁教授今日同林正財巡視檢測中心之一嘅皇仁書院。而袁教授就喺答記者問題前，先同大家講解全民檢測嘅方法同之前嘅深喉唾液測試有乜分別，佢仲即場示範到底檢測實際方法係點做。你以為林正財會做「白老鼠」？少年，你實在太年輕了！此時袁教授除低口罩兼拎出一叠佢之前嘅檢測結果報告出嚟，證明自己呢段時間因為四出巡視有密密驗身，確診自己無確診。

佢之後就跟手拎起中心嘅採樣工具同自己帶嚟嘅另一副採樣工具，親身示範採集鼻腔樣本同咽喉樣本。佢仲話，全民檢測係採取鼻腔樣本而唔係更深處嘅鼻咽，所以深入程度比冇平時醫院做嘅鼻咽拭子咁「刺激」。精采程度真係將港大醫學院院長梁卓偉同中大呼吸系統科講座教授許樹昌日前表演嘅互抽樣本比下去。

一旁嘅林正財就爆料話，袁教授以往仲試過幫自己抽血，笑言佢都未必敢做，相當佩服咁話。袁教授之後話，其實深喉唾液測試準備度都高，所以第三波疫情爆發同深喉唾液測試準確度「一啲關係都無」，不過佢都認為未必位位市民都識用正確方法「kruuua」出深喉唾液，隨時影響檢測結果，而全民檢測計劃係由醫護人員協助做鼻腔及咽喉檢測，就可以進一步提高檢測準確度。

袁教授最後都有話，冬季爆發新一波疫情幾乎係「一定嘅事」，政府有責任要做到邊境防疫滴水不漏，避免第三波疫情慘劇重演。雖然佢無詳細就政府應唔應該封關或者推出健康碼表態，但佢就呼籲市民每日出街搭車、去餐廳食飯同去商店買嘢，都可以影低車牌或者舖頭名，記低自己行蹤，萬一真係中招，都可以令醫護人員追查返，盡快阻截傳播鏈咁話，大家都不妨參考吓。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！