可惜盛會冇帶來驚喜，反而有個意外收穫，就係見到謙稱唔係「好打得」嘅林鄭局長。雖然林鄭係問責官員，出席呢啲畀面派對係工作一部份，不過佢同《基本法》起草過程似乎冇乜關係，忽然現身，即時引來諸多揣測。
有人直指林鄭真係好博，博乜呢？咪就係同愛國愛黨人士拉關係囉。自從鬍鬚曾心臟病發入院，好多人基本上已不視佢在下屆特首跑馬仔之列，因此近幾個月跑馬仔焦點都係放在唐公子及梁振英身上，有建制派人士同八方講，其實佢哋都有留意到林鄭動向，覺得佢熱身動作多多，至於是否有意落場，暫時說不得準。
林鄭一直被視為未來司長人選，有冇可能出選特首呢？八方想像力冇咁豐富，綜合各方睇法，共通點係假如鬍鬚曾真係唔玩，林鄭不失為象徵「公務員治港」理想人選，除咗「CEO治港」、「商人治港」，相信北京方面都好想做多一手「公務員治港」準備。
林鄭上任後同大地產商過節多，強拍條例亦不受小業主歡迎，與唐公子、梁振英比較並無明顯民望優勢，有個挺唐派商界人士直言，唐公子加入政府做官多年，就算北京打算繼續「公務員治港」，唐公子都勝任有餘，呢位商人仲補充，若果北京想「公務員治港」，葉劉可能先係北京不二之選。