當年今日
關於我們

中環在線:包浩斯主席夫婦早已離婚 - 李華華

蘋果日報 2009/02/25 00:00


包浩斯(483)前晚突然宣佈免除董事唐書文嘅職務,令市場揣測佢同公司主席黃銳林嘅婚姻,係咪亮起紅燈。知情人士噚日同華華講,查實黃先生同唐小姐喺07年經已離婚,所以07年打後嘅年報,董事介紹早已冇咗「黃先生為執行董事唐書文女士之配偶」嘅字句。
知情人士仲話,免除唐小姐董事職務,係整個董事會嘅決定,唔係一兩個人話事,董事會亦覺得呢個做法符合公司整體利益喎。
由於罷免唐小姐要開股東特別大會通過,咁就要計吓雙方持股量。聯交所資料顯示,黃先生同唐小姐共同持有嘅私人公司,揸住包浩斯約1.8億股(約50%股權),兩人分別直接再持有2990萬及3611.4萬股。由於唔知兩人喺私人公司持股分佈,所以唔知唐小姐有冇機會翻案。
知情人士話,股東會應該喺下個月底舉行,大家慢慢等啦。唔知雙方喺股東會前,會唔會再有一番角力呢?