林芊妤(Coffee)同譚小環今日到深灣出席美容宣傳活動。Coffee話最近做咗胡杏兒嘅瑜伽導師，佢話：「我哋曾於TVB合作，杏兒搵我教瑜伽，佢唔係減肥，只不過係生完想盡快修身，我見到佢嘅時候，覺得佢已經收得到好好，佢覺得爭少少未perfect，佢要求好高，叫我魔鬼教練，想盡快達成最佳效果，佢非常勤力，亦都能夠受好多苦，好多人都係叫我幫佢拉下筋，但係佢啲動作做得好快。」對於杏兒柔軟度高，網民見到杏兒瑜伽照以為係改圖，Coffee話：「係真㗎，係我幫佢影嘅，教咗杏兒之後，最近好多人揾我教瑜珈，其實我都係教朋友或者身邊嘅朋友。」

被大會封為女神嘅譚小環，佢話高興從商得到肯定，小環仲話希望生意同及演藝事業一齊兼顧，可以抽時間拍劇止戲癮。講到當年戈尸尸曾出碟做歌手，小環笑言：「朋家o依家仲笑緊我首《如果天空要下雨》，我聽到都毛管戙，當年太雞仔聲，雖然我攞過樂壇新人獎銅獎，但如果o依家做新人一定被淘汰。」

精選娛聞，喺晒《娛果》
http://fb.com/appledailyent