東東陳曉東下晝喺中環接受nowTV訪問，佢話會分享自己喺中、港、台三地娛樂圈嘅經驗。

東東話自己三個地方都鍾意，因為自己喺香港出世，媽咪就係台灣人，至於內地就因為一套《倩女幽魂》令佢有好多拍劇機會，所以冇得話鍾意邊到多啲。

話就話香港係自己嘅根，咁係咪因為人仔太好賺所以唔返嚟呢？東東話好多時去邊度做嘢都唔到藝人選擇，只可以揀最好嘅機會，講到自己好似隻冇腳雀仔咁。雖然成日都唔返嚟，不過佢就話自己已經入咗紙申請紅館開騷，遲吓會開嘅雷頒德仲有寶麗金紀念演唱會，佢都希望有得上台表演會吓歌迷喎。

呢隻冇腳雀仔之前個個女朋友都靚女，但係佢自稱依家冇拖拍，又話睇相佬話佢38、9歲先會結婚。點知現場有心水清記者就踢爆：「你今年咪38囉」！有啲尷尬嘅東東就話自己成日都周圍飛，就算搵行內人、行外人都好，唔通日日微信就得咩，佢話感情事冇得急，一切隨緣算數喎。