吃是學問，但自問沒有這方面的慧根，所以許多年來，吃進肚裏的米芝蓮星星，沒有100粒，也最少90。就是因為不懂吃，才跟着別人的推介吃，話晒人哋都係專家，睇住本書嚟食，點都可以少走冤枉路。那當然，我知道很多餐廳老闆和食家對這本飲食指南都嗤之以鼻，尤其是餐廳老闆。蔡東豪先生曾經說：「鹵水店咖喱屋有星，大班樓無星，這是香港飲食界之謎。」蔡生是大班樓股東。
飲食界之謎，何只大班樓冇星，Jason Atherton在香港開的三家餐廳均沒有星，也令人百思不得其解。專業食評人近幾年口徑一致，說巴黎已不是最多好餐廳的城市，取而代之是倫敦，而 Jason Atherton就是倫敦廚藝界的新一代明星。

英國同業Jamie Oliver和Gordon Ramsay未在香港開店之前，Jason已經早着先機，分別在上海和香港開了Table No.1和22 Ship，大受歡迎。然後他又再在香港開了Aberdeen Street Social和Ham and Sherry，之後Jamie和Gordon才加入戰團。
最新一期米芝蓮，榮奪三星的五家餐廳，全部食過，其中Shikon食過兩次，Robuchon食過好幾次，龍景軒食過數唔到咁多次。兩粒星嗰14間，只有名人坊高級粵菜、香宮和唐閣未試過。其餘十數間，我都覺得甚具水準，尤其是天空龍吟和Wagyu Takumi。如果你問我，我直情覺得天空龍吟可以攞四粒星。日本東京龍吟的創辦人和一位香港商人是天空龍吟的最高決策人，破格創新的味道和一絲不苟的品味是天空龍吟的保證。聽說他倆經常穿梭日港兩地開會交流和檢討，所以每隔一陣子光顧都總有驚喜。

打邊爐叫丁麵　真正賤精

真正懂得吃的人，吃得講究，不是像土豪一般，見到乜嘢貴就食乜嘢，以為「貴」就是保證。舉日本菜為例，有啲人未睇餐牌就叫吞拿魚腩加海膽，以為自己好有型，但其實講究吃魚生的人一定看季節。夏天最當做的是Ezo Bafun Uni，馬糞海膽的一種，而冬天就有我最愛的Kuromaguro，即是藍鰭吞拿，最識食的人更會選akami，即是比較「瘦」和深色的部份，但我則比較愛吃chutoro那邊，肥啲嗰part。
講到呢度，你可能會以為我食過咁多好嘢，一定好識食，錯晒。因為工作，我對好餐廳和「吃」這回事係有啲研究，但有研究只是代表吹得兩嘴，絕對不等於「識食」。好食唔好食，實在太主觀，太高深，是學問，是智慧，要懂得吃，也要懂得「悟」，味蕾與腦袋要建立默契，所以我不敢在這裏說三道四，尤其是我知道自己是食癡，白癡個癡。舉個例。
一大班人打邊爐，總有一兩個賤精，是會堅持叫午餐肉、芝士腸和出前一丁的。叫呢啲嘢有乜嘢問題？點解咁就係賤精？喂，大佬，要食午餐肉出前一丁，喺屋企慢慢食啦，原本幾蚊可以食到嘅嘢，你點解要花多幾倍價錢喺火鍋店食？你叫埋晒啲咁嘅垃圾，還要朋友同你陪葬，仲唔係賤精？雖然喺火鍋店叫唐生菜都好戇居，因為喺街市買幾斤唐生菜都唔使咁貴，喂，但係人哋起碼會喺廚房幫你洗洗啲菜，都叫做落咗啲工夫。但係你叫出前一丁，人哋淨係拆開包麵，就收你幾十蚊。朋友之中，呢啲都可算是害群之馬了，賤到冇人有。And yes，我就係呢啲賤精。

雖然我唔算識食，但係講到揀餐廳撐枱腳，我會爭住認專家。有朋友約會心儀對象吃晚飯，他選擇的餐廳驚為天人，拉麵。佢第一次同我講拉麵，我以為佢講笑。拉麵喎，咁大鑊？拉麵本身冇問題，但係同一個你鍾意嘅女仔第一次食飯，食拉麵既馬虎又不得體。絕不是價錢問題，就算你喺碗麵放兩隻四頭鮑都係咁話。
你需知嗰兩碗拉麵一嚟到你就要砌㗎喇喎，食完就撇㗎喇喎，咁餐飯食嚟有乜嘢意思？仲有，食拉麵食到嫃嫃聲，你男人老狗就話冇所謂啫，人哋女仔要顧儀態㗎嘛。再者，食拉麵嘅時候，啲湯彈嚟彈去，萬一人哋着到成個白雪公主咁，啲湯彈到件衫，乜嘢心機都冇晒啦。
出街食飯，最緊要講個crowd，即是餐廳的顧客種類。好多人以為銀彈政策必勝，有咁貴揀咁貴實冇死，你估你趙世曾咩？很多老牌星級餐廳氣氛侷促，顧客都是上晒年紀的悶蛋阿叔阿嬸，喺呢啲地方食飯太拘謹。大佬，女仔係鍾意約會，唔係相睇呀，太過「老成」和formal好難頂。既然係咁，揀元氣壽司，夠晒 young啦。咁又唔使咁極端，物極必反，太過young嘅地方都唔得，尤其是第一次食飯約喺連鎖式餐廳，是一件非常沒有誠意的事。

首次約會　三大食肆推介

好，第一次跟心儀對象約會的三個深情推介：Three Monkeys，有點fusion風味的日本串燒；Ham and Sherry，充滿優皮味道的西班牙創意；Chicha，吃秘魯菜的，有甚麼好處？食物唔錯，但最緊要嗰度「夠黑」，光線不足，如果你自問樣衰，去嗰度食，是為你的約會對象着想。當然，全香港有咁多餐廳，好多地方都可以成就你的「第一次」，這裏不能盡錄。但呢幾個地方嘅共通點，係全部都有唔少外國人幫襯，你話我崇洋都係咁話，鬼仔鬼妹是一家餐廳的最好裝飾品，入到去，感覺就係唔同啲，總之啱feel啦。價錢也是因素，千祈唔好第一餐就食咁貴，最好唔好超過800蚊兩個人。第二次要食得好過第一次，第三次就食番平民少少，然後第四次就再豪啲，這個梅花間竹的pattern值得參考。咁第五次呢？大佬，食咗第四次飯都仲未追到個女仔，仲好意思食第五次？返屋企食自己啦。
現在很多人說，識煮嘢食嘅男人好吸引。我認同，咁但你煮嘢食幾叻都好，你都冇奶油叫人第一次約會就上嚟你屋企食啩。But of course，如果個女仔真係咁open，第一次就肯上嚟你屋企「試你手勢」，你又點可以錯過呢個「施展渾身解數」嘅機會？記住，紅酒唔使靚，但最緊要夠多，加兩滴利賓納就乜都好飲㗎啦。然後，千祈唔好煮咁多嘢食，因為之後好大機會要做劇烈運動，費事陣間盲腸炎。
最後，記住記住，凡事「安全」至上，做個負責任的「食家」。

葉朗程