呢期阿仙奴陣營因為領隊雲格撕裂，有「撐雲」亦有「反雲」，曾經效力過兵工廠嘅前德國國家隊門將列文，就表態自己係「迷雲黨」陣營，怒插班反雲格粉絲太過份，對佢老人家一啲尊重都冇，喺上場英超出到飛機拉「WENGER OUT（雲格走人）」橫額。列文仲叫班阿仙奴球員應該醒醒，齊齊「打飛機」撐雲格。

列文話：「班反雲球迷太唔識尊重人，阿仙奴球員當時應該將個波射去架飛機度，維護佢哋嘅領隊。球迷喺場上舉牌表達個人意見冇問題，但咁大陣仗用埋飛機就太過份啦。」