有六爺及新人王稱號的羅富全由上季開倉，至今一直叫好叫座，馬匹在佢手上訓練大都可贏馬交代，不過有些馬亦令佢絞盡腦汁、傷透腦筋。

好似今午（22日）第五場的「同歡樂」，上季尾有場賽事一再展現強橫後勁追入第二名，以為好快可贏馬，但上仗偏偏事與願違只得梗頸四。

今仗「同歡樂」新季初出跑1400米，羅富全當然希望牠可贏馬，佢就話呢隻馬一定有能力，最弊在馬匹有慢閘毛病，引致多次姍姍來遲，未能贏馬確實唔抵。

為咗針對改善呢個毛病，六爺已安排「同歡樂」教閘、跳草閘、又試大閘，希望情況可有改善。

而「同歡樂」一向在閘廂內，情緒容易受影響，羅富全遂向馬會特別申請讓此駒較遲入閘，佢希望呢匹馬可以唔使留在閘廂內太久，以避免情緒波動而慢閘，相應令爭勝能力受損。