侍仔：仇人見面，份外眼紅，唔知道朗尼同埋C朗拿度番曼聯練波，會唔會互相「眼超超」呢？
招積域：我估唔會。
侍仔：點解呢？
招積域：因為朗尼嘅性格一係就出手，佢懶得用把口鬧你，打你就最有效率。
菠蘿文：狂牛朗尼，佢個樣同隻蠻牛冇乜分別，鬧人只係識講粗口，仲要淨係識用嗰個單字，真係爆粗爆得蠢過人。
招積域：唔單只咁樣，佢同個小朋友都係一樣。唔夠人講就出手打人，打完人仲話自己冇錯。

鬧人只識講粗口

菠蘿文：世界盃罰佢紅牌嘅球證都話，罰佢出場唔係因為佢推跌C朗拿度，而係佢犯規之後仲口多多，喺度講三講四。
侍仔：小朋友係咁鍾意講嘢啦，覺得大人講嘢唔啱就駁嘴。
招積域：唉，高蓮點解會揀個咁嘅人做男朋友呢……我自問好過佢多多聲。
侍仔：招積哥，你唔係連朗尼女友你都啱吓話？女朋友唔好亂咁揀，唔係外國月光特別圓嘅。
菠蘿文：近排曼聯嘅消息好似都幾多吓，噚日見到拜仁慕尼黑出嚟抽水，話「我哋出得起錢買雲佬，但我唔買」。
侍仔：即係話曼聯開天索價，定係寸皇馬入貴貨呢？
招積域：我覺得係皇馬入貴貨喇，一個30歲嘅前鋒竟然值過千萬歐元，最鍾意買買埋埋最後拎出去丟，呢個就係皇馬本色。𠵱家又話搞大清洗，真係苦了球員。
侍仔：車！衰得過人哋有錢呀！
文︰高洛文