蘇錦樑上月底接手商務及經濟發展局局長，呢年任期內最重要係通過《競爭法》，面對商界一片反對聲音，阿蘇都唔敢輕視鬆懈，位都未坐暖就開始發功，下個禮拜二會用官方facebook專頁「上亞厘畢道」，與市民公開討論《競爭法》，全程網上直播，講足45分鐘，八方擔心佢解釋條文隨時要花半個鐘頭，到時成功提問嘅網民可能寥寥無幾。

阿蘇局長一直被睇死無緣坐正，今次咁勇「開壇」，睇嚟係想博表現，不過目前《競爭法》最大阻力來自商界，如果雙方傾唔掂數，商界議員唔支持，政府要立法就好困難，工業總會新任主席鍾志平噚日就講到明，當局至今仍然未釐清條文細節，例如全球罰款過重及貿發局會否豁免於《競爭法》等，一日未釋疑，工總一日都難以表態支持。