4名循補選晉身立法會嘅議員已經向立法會提交初步個人利益申報，其中建築、測量、都市規劃及園境界議員謝偉銓申報38萬元嘅選舉捐贈，其中譯音YEUNG SAU SHING ALBERT嘅人士捐出10萬蚊，估計捐贈者係英皇集團主席楊受成。

除咗楊受成，恒基地產三個高層黃浩明、梁樹基同梁錦亮，分別捐出5萬元，連同「GAINWAY LTD.」以公司名義捐出8萬元，謝偉詮一共收到38萬元捐款。而四個新議員中，暫時只得謝偉銓申報咗選舉捐贈。

雖然其他新議員暫未申報捐贈，但已經申報咗自己物業。被視為富二代、保良局前主席鄭錦鐘之子鄭泳舜同新民主同盟范國威一樣係無殼蝸牛，同樣申報手上無物業，區諾軒就申報喺西貢區富藍選區擁有一個住宅物業，謝偉銓則申報喺港島區有兩個住宅物業。

《蘋果》沙士15周年系列網站，正式登場：
https://hk.feature.appledaily.com/sars15/