犯罪學家及私家偵探均相信，何俊仁今次被襲擊，其幕後主腦為有組織的犯罪分子，其目的是「志在教訓吓佢，冇計劃攞佢命」，相信警方已鎖定調查方向；而一般只要花費4至8萬元，便可以聘得兇徒施襲。
城大犯罪學課程主任黃成榮表示：「曾蔭權話班兇徒，或者不知道香港嘅民情，去天涯海角都要捉佢哋，就知佢知道件事未必係香港人做，然後帶出個信息『喂，你唔好諗住你嗰套喺香港行得通，唔好喺香港搞事！』不過就唔好咁快估係咩人做住，否則就會抹煞咗其他可能性或被人利用。」

黃成榮說，兇徒選擇在人多車多的星期日在中環下手，然後狂毆事主5分鐘，目的就是要讓事件曝光，而且鬧得愈大愈好：「鄭經翰同梁天偉被斬嘅案件，好明顯係有人要買起佢哋嘅手手腳腳，但今次雖然係打斷木棍，但用壘球棍打5分鐘都冇攞佢命，就知佢哋連咩人用咩武器都計埋，係高度專業嘅打手。至於點解要咁做，就係因為佢哋知無論點嚇何俊仁都唔會驚，所以就轉而嚇佢嘅朋友同屋企人，等佢哋畀番壓力何俊仁。」
私家偵探張大偉說，策劃該宗案件的幕後黑手，是有組織的犯罪分子：「佢可能喺附近打點一切，睇啱時機先叫兄弟落手，又叫佢哋唔好開聲講嘢，以免揭露身份，想得好周到。至於幾錢可以請個人做打手，如果係有組織咁嚴重傷人嘅話，以買起條命5至10萬計，傷人起碼都要打八折先有交易啦。」他認為中環周圍均設有閉路電視，加上事件該與何俊仁的政治活動無關，相信警方破案「十拿九穩」。