當年今日

金融人語:迷失高職

蘋果日報 2012/01/11 00:00


人稱「肥胡」的醫管局主席胡定旭近日曝光頻頻,又要幫手挺唐,又要應付輸入海外醫生單嘢。佢戴住幾十頂帽,有時可能都迷失高職,唔記得咗自己戴緊邊頂帽。
最近有會計界老行尊同我哋講,話肥胡高職之多,左右逢源能力之強,令佢嘖嘖稱奇。好似早排農行(1288)發通告指,肥胡要辭去該行董事會的審計委員會主席及委員職務,原因是他做咗德勤.關黃陳方會計師行嘅顧問,而德勤又係農行的核數師,故此要辭職避嫌。
本來有私幫生意都唔出奇,奇就奇在肥胡係安永出身,之前仲做到安永中國及香港區一哥個位,家都可以幫德勤做顧問,情況有如新地(016)前執董黃奕鑑,退休後去長實(001)做顧問,長實趙國雄第時去幫彤叔手咁。
老行尊話,本來同行互挖良才,無可厚非,但做到一家專業服務公司的一哥,掌握了不少人脈、客路及敏感資訊,退休後不為安永做顧問,而是為競爭對手獻策,即使技術上無破綻,始終有點礙眼。
講開肥胡,佢單陳年畸史,仍然沒完沒了,會計師公會的紀律聆訊,由2009年底開展至今成兩年多,都未有裁決,進度追得上王家衞當年拍《2046》。
呢單手尾長的聆訊,緣於胡定旭九十年代出任新中港集團的董事,當時新中港的核數師則為安永,新中港於1999年因為參與場外期權買賣,欠下16億元債,最終被法庭清盤。清盤人於2004年質疑同時為安永合夥人的胡定旭存在利益衝突,曾入稟索償,法庭於2008年裁定有關索償逾期,判胡定旭勝訴。

利益衝突案 查極都未完

不過,會計師公會仍決定繼續就這宗涉嫌利益衝突的個案,進行紀律聆訊。件事發生咗十幾年,好多嘢都已經人面全非事過境遷,家仍然在追究,重組咸豐年的案情,無端端又再搞多幾年,無論個結果係點,對件事對涉及嘅人,又有多大意義?這類業界組織的自查用意,有時真係耐人尋味。
在科網界投資眼光奇準的李嘉誠,最近又有新動作,就係投資SearchEngine,實行挑機Google。這家新貴,是iPhone4S聲控Siri姊妹公司,名叫Trapit。
我哋幾個月前,已講過李嘉誠投資iPhone4S撒手鐧Siri的故事。話說Siri於2010年被蘋果收購後,創作班底另起爐灶,搞個人化搜尋器Trapit。公司喺2010年6月成立之初,已吸引到李嘉誠投資150萬美元做創投基金。李嘉誠近日加碼投資620萬美元,給Trapit作第二輪融資。
既然出自Siri班底,自然與Siri一脈相承,大家都是以人工智能技術作賣點。Trapit名稱由來,是「Trap-it」的意思,標榜將搜尋器人性化。Trapit會讓用家記低喜好資訊,亦會分析用戶對搜尋結果的Feedback,不斷調整日後的搜尋結果,務求篩選出個別用家最有興趣的資訊。
Trapit創作團隊話,好希望Trapit可幫用戶慳返以往喺Google搵資料的時間。然而,Trapit野心不單止是挑戰Google,還要進攻平板電腦市場,將其個人化搜尋引擎,應用到像Flipboard等綜合內容Apps上。
連同早前李嘉誠打本25萬美元畀英國神童搞手機Apps搜尋器,超人睇好搜尋器在流動通訊設備上的潛力,不言而喻。
與投資facebook及Siri一樣,李嘉誠同樣透過私人創投公司維港投資入股Trapit,多次為誠哥睇中千里馬的維港投資董事總經理祝蔚寧,會唔會又帶來驚喜,發掘到一隻可撼動Google獨霸天下的科網巨星。

CEO秘撈好搵過正職

內地達芬奇事件越爆越醜,《新世紀》周刊上周大爆,央視去年踢爆進口傢俬店達芬奇造假,竟然是央視記者涉嫌自導自演敲詐勒索的假新聞。報道指,本身是上市公司文化中國傳播(1060)CEO的崔斌亦牽涉在內,他收取達芬奇300萬元人民幣中介費,聲稱可以跟央視相關人士擺平事件。點知崔生毫無貢獻,現時真相還原,他被質疑誠信,所以前幾日亦辭去文化傳播CEO職位。
崔斌前年中先做文化中國傳播CEO,公司2010年仲賺緊1300萬港元,但2011年上半年發出盈警,中期蝕約8000萬港元。估唔到崔斌領導公司未見成績,外面秘撈就動輒落袋300萬元人民幣。由於崔斌本身未有擔任該公司董事,外界對他薪酬所知不多。不過,從中期巨額虧損可知,崔斌做達芬奇一單刁,可能追得上全年人工。
崔斌今年先37歲,佢97年加入《人民日報》,01年又幫官方一手創立《京華日報》,03年轉到上海《青年報》任職管理層。以佢行走內地媒體多年經驗,相信日後大把機會洗底。好似內地下馬官員一樣翻生,繼續擔任中介人,收巨額中介費,個BusinessModel隨時好搵過做CEO。