由韓劇《Pasta》男星李善均主演嘅新片《黑仔刑警》將於本月13日喺香港上映，《黑仔刑警》參加康城影展時贏盡口碑，而電影導演金成勳日前來港受訪，就透露最欣賞梁朝偉同畢彼特（BradPitt），佢仲搞笑咁話：「如果可以請到佢哋一齊拍戲就好喇，我想拍一個關於佢哋相戀斷背嘅故事，相信會有電影公司肯投資。」

《黑》片係講李善均飾演嘅貪污警察殺人後連環遇上倒霉事，金成勳指靈感係嚟自西班牙鬼才導演艾慕杜華（PedroAlmodovar）嘅《浮花》（Volver）中一場雪櫃藏屍戲。今次李善均破格飾演衰得喛又令人同情嘅警察，金成勳大讚佢啲戲貼近現實又專業，金成勳：「最辛苦係拍攝尾段李善均同趙震雄喺寓所嘅打交戲，足足拍咗四日，佢兩個都有受傷，而李善均仲要冒險喺18樓爬窗，但佢拍幾多次都冇怨言。」