韓國男團JYJ成員朴有天上月捲入涉性侵案，由於朴有天喺韓國屬一線藝人，所以佢單新聞就成為各大電視台、傳媒爭相報道嘅題材，而唔少電視台都出盡法寶爆勁料，當中上月29號韓國《TV朝鮮》播出嘅節目《強敵們》中，時事評論員李奉奎就忽然喺節目上爆料，指上月4號首名原告指控遭朴有天喺娛樂場所嘅廁所內性侵，原來當日有其他當紅藝人在場，搞到曾經同朴有天合作拍劇集《成均館緋聞》嘅宋仲基以及佢師弟朴寶劍無辜中槍，幸好宋仲基嘅緋聞女友宋慧喬透過事務所為宋仲基力證清白。

噚日警方就話根據4名起訴朴有天性侵嘅女子嘅口供都冇提到現場有其他藝人，令到網民懷疑《強敵們》節目嘅爆料係想增加收視，加上宋仲基同朴寶劍無辜捲入其中，一眾粉絲都相當憤怒，仲紛紛去到《強敵們》嘅官網留言鬧爆，要求佢哋要公開道歉，又要求要廢除呢個節目。

而韓國放送通信委員會嘅相關人士今日回應傳媒時就話，因為《強敵們》播出之後，有好多觀眾都打電話嚟投訴抗議，所以佢哋都商討緊會唔會進行針對《強敵們》節目嘅審議，本周內會作出係唔係要提交審議嘅決定。