豬流感橫掃全球，要對豬仔避之則吉，但對牛仔就要親多兩親，周六日聯磐田山葉主場對「神戶牛柳」勝利船，冷敲有50倍的3:3波膽。
山葉簽入南韓射手李坤厚後，配合原有的基仙奴及前田遼一，攻力明顯比季初好，近4場聯賽入了7球。另外，射手基仙奴開「咧」至今都有好表現，7場聯賽入5球，故有力破勝利船大門。至於勝利船前鋒茂木弘人近況好，加上之前養傷的射手馬素奧古士圖亦全面復出，攻力有保證。還要留意的是，兩軍同是守力差，山葉8場失16球，勝利船則失13球，加上過往交手多大手交易，其中勝利船兩次贏3:2，故今仗一於扒冷，博打和3:3。

山神打「雷」博3:0

今季日聯的升班馬相當搶鏡，其中我愛隊廣島三箭人腳好，故取得好成績兼入球多（8戰取得2勝4和2負及入17球）亦屬意料中事，反而山形山神就真的予人驚喜。這支鄉下球隊冇球星，最出名亦不過曾效力是古橋達彌，不過踢落一點都不輸蝕，8戰取得4勝2和2負，其中於上屆日乙入13球的長谷川悠繼續有好表現，8場聯賽轟入5球，故迎今屆場場失波的柏雷素爾，有力大勝，冷冷哋要他們贏3:0。
廣島三箭迎清水心跳，三箭上場對鯨魚打和0:0，今屆首次沒入球，但他們攻力勁，3線球員如佐藤壽人、高萩洋次郎、史杜恩諾夫及槙野智章等都懂入球，故有力在心跳身上取得入球，基於他們守力平平，博他們贏4:2。
文：青蛙仔