【新增圖片】澳洲男星曉治積曼（Hugh Jackman）為超級英雄片《盧根》（Logan）最後一次演「狼人」，佢拍住宣佈唔再演「X教授」嘅柏德烈史釗活（Patrick Stewart）展開三日兩夜台灣宣傳之旅，今日二人就喺台北文華東方Ball Room舉行記者會，開始之前柏德烈史釗活先以國語講「你好、愛你們」，佢又話想同大家Say Sorry，佢話自己雖然冇X教授咁老，而且比佢身體健康，但佢由紐約飛嚟台北時間好長，好唔舒服，噚晚更要缺席首映，向大家正式道歉。

曉治積曼就話噚晚班fans好熱情，佢會代柏德烈接受所有fans嘅熱情。佢首映後去咗饒河夜市食臭豆腐。因為佢識個台灣人攝影師幫佢寫咗個必食checklist，去到就跟住覓食，學識咗臭豆腐國語，又即場講：「很好吃。」

提到今次係最後一次做呢個角色，曉治積曼話之前響柏林睇片時好感動，佢當時拖住柏德烈隻手喊咗出嚟。呢個係有史以來最難忘嘅角色，永遠留喺佢心入面，相信以後會有其他人會再演呢個角色。曉治積曼指噚晚首映見到一班fans扮狼人同埋X教授都扮得好似，扮X教授嘅粉絲仲整埋個光頭，其中一個仲係女仔，佢見到不禁覺得以後實有大把人可以演到呢個角色。

柏德烈於會上話：「我喺柏林先決定唔再演呢個角色，因為睇到完場時覺得結局so beautiful so perfect.」佢覺得以後未必再演到咁好。問到想唔想同華人導演合作？曉治積曼就答：「要睇時間同夾唔夾到，但我哋係Open and available的。」再問想邊個演下個狼人？曉治就話揀唔到，佢自己本身都係狼人角色第三人選。今集小妹妹演得幾好，佢話Mavel可能都係拍小狼人都未定。

大會即場送咗台灣畫家嘅X教授畫俾柏德烈，自言係藝術收藏家嘅佢笑指畫到X教授好後生。另外，大會仲送咗個人手造嘅狼人同X教授扯線公仔畀佢哋，話係將台灣手工藝融入咗佢哋角色，兩人收到之後都好鍾意，曉治就話要確保個公仔遠離屋企對仔女免得被整爛。