西環話事人張曉明破天荒去立法會「傾吓偈、食餐飯」，正式為政改方案談判揭開序幕；眼見西環咁緊張，狼振英點都要做吓嘢，相約一班學者同政界8月1日食飯論政改。唔知呢餐飯，中央政策組首席顧問邵善波會唔會列席呢？事關呢位波叔試過開會變開拖，政界中人都大叫怕怕！
事緣煲呔喺2010年推政改方案時，總動員各政策局做游說。當時任中央政策組全職顧問嘅小人波，向來極少同泛民學者接觸，但有次佢直屬波士、即係劉兆佳order佢去「招呼」學者，聽吓學者群對政改方案有乜嘢意見，小人波因此不情不願咁出席「交差」。

搭枱咁款等埋單

據知相約幾名學者喺中環陸羽茶室「交流」嘅小人波，一埋枱已經撩交打，個人先Solo十分鐘，發表佢嘅保守「高見」；學者插嘴反駁咩，佢就更激動咁投入呢場辯論。八方聽聞班學者當時㷫到爆，明明獲邀去傾嘢，點知變咗去被訓斥；眼見開會變開拖，浪費唔少寶貴時間，最終都唔想理佢，有人索性開聲叫小人波：「不如你坐埋一邊，畀我哋自己傾嘢算數嘞。」
估唔到小人波喺呢個問題上好忍讓，據聞佢之後真係搭枱咁款，一直蹺埋雙手嬲爆爆坐埋一邊食自己。點解唔叫小人波告退費事眼寃？查實呢，嗰餐茶既然係中策組約嘅，理所當然由小人波埋單，但有與會者話食多幾籠蝦餃、豬膶燒賣，都補唔番要硬啃小人波呢件極品呀。

mailto:[email protected]

倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24