今日驚聞《Yes!!》停刊，白色恐怖？NO！於網絡盛行兼夾冇香港明星時代，《Yes!!》仲生存到今日，已經算係咁。人就係咁犯賤，你要我依家俾錢買？（轉一轉國語先）沒可能！但聽到佢摺，又覺得好可惜，話晒以前真係神心到逐期儲，集齊一定期數，仲可睇到書脊全幅漫畫。始終《Yes!!》喺那個屬於我的中學時代盛極一時，如果要懷緬過任何有關《Yes!!》嘅集體回憶，相信除咗係毒瘤明、周慧敏同埋周慧敏外，數極都仲有。

1：想當年YesCard人人儲，你試下俾我抽到張雙閃、幻影、限量版呀，開心到暈呀！當年YesCard更帶挈一班中小學生借炒賣YesCard發達，每日YesStation門口都會係一個交易所，聚集大量YesCard買賣家。所以《Yes!!》曲線提供創業機會！依家冇咗《Yes!!》，YesCard係咪會好似Puzzle&Dragon咁抽Appcard？

2：年青男女，血氣方剛，你冇理由冇睇過「MissSex熱線」。呢個欄目話就話教人正確性知識，但相信唔少人都係當「甜故」咁睇。其後「MissSex熱線」更被於法庭上踢爆，熱線內容好多都係出自一位秘書姐姐手筆。至於依家仲有冇「MissSex熱線」，太多年冇睇，我唔知。

3：「校花校草」選舉係所有中學生一年一度MustFollow環節，每一個參加者，都會被全港中學生評頭品足。當你發現你學校有人參加，嗰個人就瞬間成為焦點。翻查資料，鄧麗欣Stephy係2000年校花冠軍。至於近年校花校草，Um...上網睇到，不願置評。

4：想當年專發掘城中靚女學生嘅「城市驚喜」可算係眼光一流，張栢芝、Isabella、阿Sa出道前，就係俾呢個版面率先發現！另外，互聯網未興前，「眾裏尋他」專識新友，有幾多人有試過？

5：當年《Yes!!》由於紙質靚，唔少人會將雜誌內一頁過嘅明星照，好細心咁撕落黎，然後用來做教科書封面或封底。撕落黎時一定要用「界刂」刀，咁樣先至會Perfect！但《Yes!!》只係A5Size，好似太細？唔怕！後來出咗本《YesIdol》，有A4Size，岩岩好Fit到一本書。

6：以下係個人經歷。話說當年仲係薯Look嘅千頌C，有一日同同學仔放學，突然有個男人上前問我哋借紙巾，咁我哋咪借囉。點知下一期《Yes!!》，就出現類似咁嘅標題：「XXX中學女生　歧視Gay男　紙巾都唔借」。原來《Yes!!》當日安排2個男演員坐喺學校附近開揚處攬錫，然後本書就老作，屈我哋歧視男同志，仲圈起本人，話我用凌厲眼神怒啤兩名演員，仲屈我，話我唔肯借紙巾！事隔多年，記憶猶新。我要強調，千頌C係絕對尊重每個人戀愛自由！（千頌C第一次見報，竟然係咁……）

《Yes!!》依家話轉型做網上，但最近《主場新聞》執笠，到底做唔做得住？今日先開張嘅網媒《全民媒體》創辦人李兆富噚日做《青談三分鐘》嘉賓，提到廣告以外，網媒仲可以點搵食，想知？去片！

by千頌C@堆填區
http://www.facebook.com/winbigwok