當年今日
關於我們

政壹花生友:
鄭家富又喺新東動起來 - 花生友

蘋果日報 2015/02/10 00:00


今、明兩年嘅區議會同立法會選舉,等睇戲食花生,是常識吧。花生友最近一個月,分別同泛民及建制中人飯局,只要一提起明年嘅立法會選舉立立亂,大家異口同聲都話最關注,議席唔夠分、爭到飛起嘅新界東。
泛民同建制兩派陣營,當然都四出打探吓敵方軍情,而大家原來不約而同傾起新界東嘅一個人,就係喺上屆唔再參選立法會選舉嘅前民主黨立法會議員鄭家富。佢哋話喎,近日見到久違咗嘅鄭家富橫額喺街邊掛起,由於婚姻監禮人嘅競爭日漸激烈,令到佢哋忽然諗起:當年因為政改方案同民主黨分手嘅鄭家富,會唔會就喺呢次政改風波後,明年選舉捲土重來?
田少不願靜下來
而新界東較為明朗嘅選情,係公民黨湯家驊似乎真係意興闌珊,但係咪可以全數過票畀徒弟楊岳橋?就係未知數。而民主黨蔡耀昌預料亦唔再參選,兩張名單上屆攞到嘅四萬票流向如何?好多泛民都囉囉攣。
建制派方面,有傳應該喺一月加入自由黨嘅工業界林大輝,盛傳「嫁又唔嫁」,上周對此欲言又止,不欲回應。之前已經講過啦,自由黨立法會新東代表田北俊唔再參選,若然大輝唔入黨,新東個位點樣傳承好呢?有人就留意到,田少近日動作頻頻,喺facebook相當活躍,有不願靜下來嘅眉目。如此看來,田少係咪肯肯定唔參選?連佢嘅某啲黨友都話唔敢肯定。