當年今日

Game事撻:PSP上鹹蛋翻生 再戰巴魯坦星人

蘋果日報 2006/07/25 00:00


經歷40年,再次「鹹蛋翻生」!事關PSP啱啱為鹹超40周年,出咗隻《UltramanFightingEvolution0》(UFE0),以玩隻抽打交為主,最正係有齊8個超人同8隻怪獸俾你揀,包括深入民心嘅吉田同太郎、新超人Mebius,仲有超經典雙蟹箝嘅巴魯坦星人!
記者︰陸俊雄
超人Mebius首度登場
玩呢隻Game,有個超人一定要用,佢就係最新一代超人Mebius。佢都幾巴閉,4月喺日本首播新一輯超人前嘅記招上,由一眾舊超人,包括吉田同七星俠等撐場下,介紹出場,為鹹超故事再推上另一高峯。
眾新超人中,Mebius係今集唯一可選用嘅;好似喺香港幾受歡迎嘅廸加、帝拿等,都未見出現,相信年輕Fans會幾失望。不過Mebius造型好細緻,佢招撻技更加唔要命,捉住對手一齊飛上天再直插落地,動作異常精采。
empty
■巴魯坦星人可以在PSP再次喪拑鹹蛋超人。 
empty
■可睇番好多熟口熟面嘅怪獸同經典場面,夠晒懷舊。
empty
■就算Mebius係新人,十字死光呢招傳統技係冇得改變,要跟超人一代吉田(右面)學嘢喇!
empty
超人吉田
empty
七星俠
絕招跟足原著
其餘7個超人,每個都有大批Fans支持,包括第一代超人吉田、七星俠諸星彈、超人阿鄉、男女合體嘅Ace、超人太郎、專負責拯救兄弟嘅佐菲,及來自獅子星座嘅超人尼奧。
筆者最鍾意七星俠,Fans一定知道,呢位仁兄唔單止可以變大變細,佢仲唔多鍾意用死光,反而愛用頭上把回力刀。Game入面喺每次開波對打前,佢係唯一會由細變大咁出場,佢仲能夠一次放16Hits嘅飛鏢,絕技回力刀更係繼當年喺劇集出現過後,重現大家眼前。
至於吉田,依舊企到好似揹住個「駝峯」咁等開波。佢招著名大風車撻人技,動作流暢到不得了,直頭Feel到佢托住對方雙腳時有重量,再使出風車大迴環,簡直係爽!不過要數最完美招數就一定係尼奧狂舞雙截棍,耍完仲要擺晒姿勢等影相咁,係一個娛樂性豐富嘅角色。
empty
■未出現太郎同尼奧前,最情同手足嘅5兄弟。
empty
■開始時只有8個超人揀,怪獸要慢慢打返嚟。
天色按時間改變
呢隻《UFE0》唔單止喺超人動作同造型上跟足原著,喺戰鬥場景設計上更落足心機。玩家打故事或戰役模式時,天空顏色會因PSP內嘅真實時間而改變;即是早上打係藍天白雲、下午打係黃昏、夜晚打係漆黑一片。筆者最欣賞係黃昏,因為連光線射到超人身上嘅明暗改變都有埋,畫面超級細膩。至於VS或練習模式入面,冇所謂時間之分,因為17個場景已預先按早午晚劃分晒。其中1個場景有5個十字架要特別留意,佢係當年超人5兄弟誤入地獄星人陷阱,要超人之父出手打救嘅場景。故事模式內,太郎亦要喺度救佢嗰5位兄弟。
empty
超人太郎
empty
■用唔同超人玩故事模式時,情節長短都有唔同。
empty
■呢個遊樂場日景都幾靚,VS或練習模式仲有黃昏同夜景揀。
大圖鑑Fans必儲
對於呢類以取悅Fans為主嘅遊戲,肯定唔少得爆機後嘅特典獎勵,而呢款《UFE0》就有個「超辭典50」模式,入面總共收錄咗50個「超辭典」,有齊各鹹蛋超人嘅歷史同介紹,對於鹹蛋迷嚟講算係一大喜訊!不過每項均要某個程度嘅Ponit先可開啓,想儲齊50個「超辭典」,真係要努力打爆多啲機喇!
empty
■開啓每個超辭典都要分數,想儲齊就要努力爆機。
PROFILE
遊戲類型︰格鬥遊戲
對應機種︰PSP
遊玩人數︰1人
開發廠商︰BANPRESTO
發售日期︰7月20日
行貨售價︰$278
empty