由以色列女星姬嘉鐸（Gal Gadot）主演嘅DC漫畫超級英雄新片《神奇女俠》（Wonder Woman）熱爆全球，已育有兩個囡囡嘅佢成為新一代女神。

其實姬嘉鐸曾經參加電影《狂野時速》（The Fast And The Furious）第四至六集，憑演女特工Gisele一角已經嶄露頭角，而佢與《狂野》舊拍檔雲狄素（Vin Diesel）仍維持友好關係，近日姬嘉鐸就抱住囡囡同雲狄素聚舊，仲將只得3歲嘅囡囡首度曝光。

雲狄素日前公開與姬嘉鐸母女喺荷李活大宅拍攝嘅合照，留言寫住「當我們不當英雄人物」。鏡頭以外，佢哋其實都只係小朋友嘅父母，見到相中雲狄素囡囡Hania喺佢懷中瞓着咗，而姬嘉鐸亦用奶樽餵3個月大囡囡Maya飲緊奶，素顏嘅佢展現幸福笑容。