【新增影片】

曼聯喺首輪歐聯分組賽3:0大勝巴素利賽後，領隊摩連奴唔滿意球員喺領先時，過份鬆懈而踢得太花巧，批評佢哋以為自己打緊PlayStation咁，而嚟到周三第二輪分組賽開打，米希達利恩就擦摩佬鞋，話呢位領隊永遠是對的！

曼聯贏巴素利一戰，摩佬覺得班球員因為一早領先，所以態度唔多認真，踢到好似PS入面啲球員咁，成日想表演花巧嘢，但呢番言論當時出咗後，即引嚟PS官方還擊，話佢哋啲遊戲唔識泊大巴，只係識得娛樂大眾，靚抽一下摩佬。米希達利恩周二出席歐聯作客莫斯科中央陸軍嘅賽前記招時，又再提起呢件事。

「MK仔」就賣口乖咁講：「每個人都知道摩連奴要求高，所以佢咁講係啱㗎！佢冇開名話係邊幾個，但我哋每個人都心裡有數，知道有人犯咗錯。我哋嚟緊會更集中去應付每一分鐘，唔會再好似之前咁，喺完場前20至25分鐘開始踢PS足球。」

關於對手中央陸軍，MK仔話：「我成日睇俄超，中央陸軍亦睇唔少，佢哋陣中好多球員有豐富經驗，但歐聯同俄超好唔同，希望同佢哋交手，佢哋會失準。」