啲人成日話碧咸去到美國洛杉磯「印印腳」袋走銀河份大人工，我求大俠就話佢忙到甩轆至真，啱啱睇完NBA撐完湖人場，之後仲要幫洛杉磯銀河踢足全場，真係少啲精力都頂唔順！
不過又真係吹「咸叔」唔漲，今年做隊長帶到銀河有聲有色，令銀河變成「銀行球隊」；日前對住肯薩斯巫師，仲完場前離門70碼射入一個超級遠射幫球隊反勝3:1，睇到美國啲球迷O晒嘴！
上季碧咸因傷關係，喺美職聯一球都冇入過，今季就9場省入4粒！唔單止咁，碧咸梗係唔會收埋「七旋斬」唔益人啦；今季碧咸交出咗5個助攻，當中大部份都係益佢嘅隊友當路雲，𠵱家佢仲以９球排喺美職聯神射手榜第1位㖭！唔單止咁呀，仲有個黑人前鋒艾臣布度都好「弗」，近兩場入4球，銀河有你哋3個夠打啦！

追「大」趁手

不過大家吹到碧咸同當路雲咁勁，我求大俠就對銀河呢隊波有啲保留。大家咪睇銀河𠵱家排喺西岸榜首好似好威，其實大家有睇過呢隊波都知佢哋實力有限；好在銀河勝在入得又失得，今季就入咗全美職聯最多嘅22球，不過佢哋失嘅17球，亦係聯賽第２多嘅，仲開出8「大」1「細」嘅盤路。計我求大俠話，以後見親銀河出場即買「大」實冇死，大家一於煲爆銀河個「大」將佢哋變「銀行」，不過最好有買趁手，因為若果遲啲足智彩開「大細」中位數3.5球，大家又盞頭痕啦！