當年今日
關於我們

辦學優惠 - 左丁山

蘋果日報 2002/01/17 00:00


李嘉誠在北京辦長江商學院,開辦MBA課程,據講每年學費收二十四萬元,如屬實,喺亞洲可能係最貴,但能否賺錢,仍屬未知之數,話佢辦學牟利,實乃淺薄之言。大凡私人辦學,一定要適應市場需求,學費收得高,教師薪酬亦要有番咁上下,世界級啲MBA師資,一啲都唔便宜,何況重要請佢哋去北京教書,包埋住宿旅費?要吸引啲一流學者喺北京生根,你估好容易乎?
新加坡為咗吸引世界一流學院到新加坡,不惜工本,搵MIT與芝加哥到該地辦分校。
上日在世貿中心食完午飯之後,與賓架E一齊返中環,傾起芝加哥大學。賓架E在芝大讀書之時,王于漸大教授啱啱寫完博士論文,做銀行多年,算係芝大資深校友。
據賓架E話,芝大經濟系最推崇香港,佢哋歡迎佛利民訪港之時,佛利民在天星小輪上對班校友大讚香港嘅不干預政策。
芝大想嚟亞洲開辦分校,好想好想到香港,但芝大要求當時嘅港府畀優惠(例如撥地),港府一口拒絕,唔想開先河。芝大於是走咗去新加坡,星政府倒履相迎,所以現在芝大新加坡分校嘅建築羣,古色古香,極富中國色彩,人人話靚。
賓架E話呢件事好諷刺,因為鼓吹自由市場嘅芝大,為咗攞政府津貼,竟然跑去新加坡,可見世事往往係講一樣,做一樣也。