民建聯九西立法會議員鄭泳舜當選唔夠一年，就有功課交。據了解，政府有意將深水埗欽州街西與通州街交界一塊臨時用地，用作興建過渡性房屋，下月就此向區議會提交文件，諮詢地區意見，計劃涉及超過250個單位，料1年內完成土地平整同興建，2020年就可以入伙，若然成事，會係首個利用政府用地興建嘅用作過渡性房屋計劃。

睇返資料，原來鄭泳舜9月已經向區議會提出相關議案，10月仲喺立法會答問環節兜口兜面問特首林鄭月娥，之後又約見政府部門，似乎係佢成功爭取喎。八方問過佢，佢謙稱政府肯開波只係起步，之後仲要經過區議會討論，日後亦要搞得好先叫成功，但呢個消息已經係佢嘅最大份Boxing Day禮物，希望可以成事，等政府有個首例，之後更易陸續推出更多過渡性房屋喎。

八方問過當區經民聯區議員梁文廣，佢話由於9月區議會已經通過咗一次相關項目，預料下月通過政府建議嘅機會好高，話晒大家都有同一目標，就係解決住屋需要，但文廣話因為塊地本身係規劃做休憩用地，所以要為項目設立期限，不能永久變成住屋用途，要一併諗吓點樣做好啲配套。