29歲美國小天后Rihanna月初因為身型暴漲而引來熱話，唔單止咁，前日佢仲被影到喺西班牙度假時，喺私人別墅嘅泳池同一名鬍鬍男戲水舌吻。英國媒體隨後起底該神秘男，原來佢叫Hassan Jameel，家族係中東地區豐田汽車經銷商，家族資產有成15億美元（約117億港幣），更爆嘅係原來佢係超模納奧美金寶（Naomi Campbell）前度，即接令Rihanna同納奧美呢對好姐妹反面！

Rihanna過往情史多為圈內人，其中Chris Brown就暴力對待過佢，自舊年10月同Drake分手之後，又同里安納度狄卡比奧（Leonardo DiCaprio）傳過緋聞。周二佢被拍到喺西班牙度假時，同Hassan於泳池內戲水、忘情舌戰，絕對係熱戀當中。不過，原來Hassan係「黑珍珠」超模納奧美金寶前度，自從呢張相出街之後，就有fans發現兩位昔日好姐妹unfollow咗對方Instagram！Rihanna同納奧美一直好老友，周不時齊齊出席活動，又因為對方同屬黑人女星，更加同一陣線。據講納奧美知道對方同自己前度拍拖之後勁嬲，雖然表面上仍然扮冇嘢，但其實覺得Rihanna好唔俾面自己，可能因此令佢哋決裂。