洪永城、麥明詩同Rapper KT今日去到將軍澳出席聖誕活動，洪永城受訪時表示聖誕期間去咗親戚朋友屋企開party，講到有報道指佢自從同唐詩詠分手後，今年冇再獲邀出席唐詩詠和陸永等舉行嘅聖誕party（新聞連結： http://bit.ly/2zxUeM0 ），洪永城話：「我嗰日有嘢做去唔到，其實佢哋有邀請我，都冇咩所謂佢哋大家都係朋友，平時都有見面亦唔會尷尬。」

洪永城又表示喺親友嘅聚會期間，親戚們好想介紹女仔俾佢識，佢話：「有好多東南亞嘅女仔，有泰國嘅，又有西班牙嘅女仔，不過都係佢哋講下啫，十劃都未有一撇。」問到外國女仔接唔接受到？洪永城話：「咁我喺紐西蘭讀書都OK嘅，我英文都講得兩句，可以扮吓鬼仔。」

另外，麥明詩就表示聖誕去咗英國旅行，佢話：「同一班大學同學返咗去旅行，去咗6日左右，期間有去到玩佢哋嘅冬季嘉年華，掟吓公仔都幾開心。」問到今次英國之行有冇識到新男仔？佢話：「冇呀，好慘全部都係舊同學。」咁舊同學入面有冇啱嘅對象？佢話：「冇喇，要過電一早就過咗啦，如果過唔到即係冇得過電囉。」

麥明詩又透露嚟緊要為勁歌頒獎禮綵排，問到你係咪表演唱歌定跳舞？佢話：「唔係，好似係表演講嘢，不過詳細係點我都未清楚。」

更多娛聞，喺晒《娛果》
http://fb.com/appledailyent