鮑姐擔正嗰套《同盟》喺星期三播完大結局，跟住安排咗王浩信、張振朗、朱千雪同蔡思貝嘅《踩過界》緊接，實行一連4集播映結局篇！

呢套劇喺16年10月開拍，拍完冇耐就係17年節目巡禮推介劇集之一，因為同《愛奇藝》合拍嘅關係，所以喺6月推出嘅時候，點擊同口碑都唔錯。噚晚《踩》嘅故事發展話朱千雪幫王浩信做手術，終於可以睇返嘢，點知朱千雪知道單立文約咗張振朗去貨倉，佢就靜雞雞跟埋一齊去，去到貨倉之後，張振朗見到單立文想殺佢，兩個打咗一輪之後，張振朗搶咗單立文把鎗，企咗喺轉角位等單立文出嚟，當張振朗聽到人聲，轉身出嚟開鎗。

對眼得番嘢嘅王浩信，去到現場見到朱千雪死咗，張振朗同單立文都暈低咗，大家都成為嫌疑犯，王浩信接受唔到朱千雪嘅死，情緒即時崩潰，爆喊，仲埋怨自己點解要收埋自己，之後佢去咗以前一齊食飯嘅餐廳回憶往事，仲一個人走入戲院睇戲，雖然戲院觀眾笑到起，但係王浩信一個人喊到飛起，真係睇見到心酸！

不過世事往往就係咁奇，估唔到當心愛嘅人死咗，懷緬人嘅方法，原來都係嗰幾樣！呢個情節同去年1月播出嘅韓劇《Signal》離奇撞橋，當中劇情同樣講男主角嘅另一半已經唔喺世上。《踩過界》裡面，張笑片戲飛係朱千雪之前買，準備同可以睇番嘢嘅王浩信一齊睇；而《Signal》「咁啱」又係女主角元靜之前買落，諗住同趙震雄一齊睇，借機表白，但未等到呢日，元靜意外身亡。兩劇嘅男主角，結果不約而同拎住女方留低嘅心意入場。整個戲院人人睇到笑不停，但唯獨男主角傷心痛哭。

《Signal》呢場男主角喺戲院傷心痛哭係發生喺出第四集差不多結尾，劇情講李帝勳話畀趙震雄知喺呢個年代終於捉到京畿道南部殺人案嘅兇手，原來兇手殺害趙震雄嘅心儀對象元靜，得知消息後趙震雄就拿住同元靜冇法欣賞嘅電影戲飛入場睇戲。雖然大銀幕正播放一齣笑片，全場觀眾個個笑不停，但唯獨趙震雄望住身旁空空的凳子，一邊看住笑片一邊因憶起元靜而傷心痛哭，與其他觀眾形成好大對比。

講番呢套韓劇《Signal》，係由趙震雄、金惠秀及李帝勳主演，播出以來贏盡收視及口碑，劇集喺第52屆百想藝術大賞電視劇部門中，勇奪最佳劇集、最佳女主角及最佳劇三大獎項。故事講身處現代嘅罪犯側寫師李帝勳偶然獲得一部對講機，並能夠與15年前嘅刑警趙震雄對話，兩人從而透過對講機對話及查案。

睇嚟唯一嘅解釋，真係如有雷同，實屬巧合！