股市上嘅奧運效應雖則已經炒燶咗，但係喺其他界別上，仲越炒越㷫，包括娛樂界，同埋小妹熟悉嘅旅遊界。先排電視日播夜播鳥巢、水立方等奧運場館，引到好多人流晒口水想即刻飛去北京，親身體驗郭晶晶奪金、同埋劉翔傷出嘅地方。
有旅行社食住電視觀眾條水，於殘奧期間開團直插奧林匹克公園心臟，玩轉鳥巢同水立方。小妹都心郁郁想去吓，同事阿貴有幸喺奧運期間入過奧運公園，問佢有乜高見，佢即刻噴到收唔到口。

水立方夜景醉人

阿貴話，玩奧運公園有幾個值得注意嘅地方，首先，鳥巢同水立方日夜都有賽事舉行，如果可以嘅話，盡量揀夜賽，咁樣喺賽前賽後，都可以欣賞到水立方嘅醉人夜景。日頭嘅國家游泳中心係超級發泡膠一大塊，睇頭遠遠不及黑幕下發光發熱嘅水立方。
其次，鳥巢分上中下三層，最上層要爬百幾級樓梯，除非閣下老弱傷殘病，否則場館人員係唔會俾你搭升降機嘅。鳥巢就日夜觀賞都OK，但係記緊，唔好自備飲料同雨遮，呢啲物品都會被安檢人員充公。
大家喺電視報章上都可能留意到，奧運公園有個中心區，好多國際品牌開展館，奧運期間不知幾擠擁。但係絕大部份展館喺8月底已經人去樓空，你話佢哋歧視又好，慳錢又好，總之今後就冇咗呢一個可以嘆冷氣、攞禮物嘅好去處。仲有樣緊要嘢，中國大陸係一個監察人民好嚴密嘅地方，成個奧運公園安裝咗成千個閉路電視，千祈唔好做啲唔合法、冇公德嘅嘢呀！
電郵：mailto:[email protected]
逢周六、周日刊出