四川成渝（107）經呢轉港股大洗倉，本身H股比A股，大折讓咗55%，兼且係NAV折讓最大嘅公路股。

呢期公路都俾洗倉，場內擔心，祖國經濟唔掂檔，公路股亦走唔甩。但咁睇，就算以專業評估，成渝今年倒退10%0既EPS0.28元人仔計，成渝由4月頭高位5.2元水位，插咗50%過外，現價（2.34元）預測PE得番7倍，比起本身歷史平均值10.4倍，同行家平均預測12倍PE，平咗一大截。

又場內專業評估，成渝今、明兩年預估0.49倍同0.47倍PB，行家寧滬高速（177）明年預估1.6倍PB、浙江滬杭甬（576）1.46倍、皖通（995）0.94倍，深圳高速（548）0.4倍。成渝PB至平。成渝A股（滬601107）噚日跌咗9.9%，就算係咁，集團H股仍然比A股折讓55%。行家寧滬H股比A股，係有溢價，深圳高速H股比A股折讓37%，皖通51%。成渝A、H股折讓，又係最大。

成渝近幾年開拓公路建設同城市建設瓣數。呢期祖國經濟數據無眼睇，阿爺免硬著陸，肯定要多方位谷經濟。又就住一帶一路發展，四川省本身，亦規劃咗2014年至2030年高速公路網，估計全省高速公路總規劃，要去到1.2萬公里，成渝近水樓台，而隨住新瓣數反映，亦支持到中線成績單表現。

成渝嚟緊周四（27號）派半年度成績單，加埋港股橫風橫雨，再跌博喺三年橫行底兩蚊兜轉，到時，保守預測成渝有4厘息，兼得0.39倍PB，有番咁上下防風力，博翻半番到3蚊計，PB先得0.6倍，仲未追到最近磅0既深高速。

掌握財經生活資訊，即Like「蘋果ATM」fb專頁啦！
http://fb.com/appledailyatm