韓國限定組合I.O.I成員出身嘅女星金請夏，近日推出solo專輯《Hands on Me》回歸，有網民指金請夏嘅外表跟去年以I.O.I成員身份活動時好唔同，因而傳出佢整容，金請夏就回應：「係因為減咗肥。」

金請夏於訪問中表示：「以solo歌手出道，為咗令大家見到我嘅變化同成熟一面，所以就減肥，食得好少，然後做好多運動。不過因為要準備宣傳，原本係唔食碳水化合物，依家就食啲啲。我覺得我要一直減肥先得，於I.O.I活動時因為太忙，所以冇做到，而且跟I.O.I嘅朋友一齊食嘢真係好開心。」金請夏透露依家減咗大概9至11磅，目前體重係92至95磅左右。

對於靠整容變靚嘅傳聞，金請夏表示：「因為減肥，輪廓都變得更明顯，而且我已經箍完牙，又接受姿勢矯正，仲換咗美容院，因此外貌先有變化吧。」仲補充：「化妝嘅力量真係非常大啊！」