無綫劇集《老表，你好嘢！》自播出以來，收到不少投訴，但仍獲大批觀眾支持。祖藍昨日率領眾演員宣傳，連懷孕33周的湯盈盈亦挺着巨肚到場，《老表》演員晒冷玩不文望再谷高收視，祖藍說：「200幾宗投訴換200萬觀眾支持，多謝晒！」

王祖藍、郭晉安、萬綺雯（蚊蚊）、湯盈盈、王菀之、張繼聰、朱咪咪、岑麗香和林盛斌　等昨日在將軍澳出席《老表，你好嘢！》活動，祖藍問Bob兩場床戲是否已播？朱咪咪搶答問Bob：「夠膽同我上，天氣濕，我係驅風祛濕除寒痰。」

盈盈有咗照跣低

寫揮春時，朱咪咪祝大家「一柱擎天」，並望住大肚盈盈說：「我可以做奶媽。」令人捧腹大笑！祖藍對有觀眾投訴，他說：「200幾宗投訴換200幾萬觀眾支持，多謝晒！」當與現場觀眾玩遊戲送中山旅遊禮券時，其中一位觀眾是剛來港的內地遊客。最後岑麗香抽中金蛇，祖藍笑說：「唔公平，佢得一場戲，唔好話公司唔放資源喺你身上。」
講到安仔在劇中金句「問題天天都多，Beli Bala Beli Bala」，他笑說：「最初講有少少尷尬，講講吓好順。」安仔又大讚蚊蚊在劇中的學生look，令他有很多童年回憶。已懷孕33周的盈盈透露預產期在3月中，希望屆時順產，是否已為囡囡改名？她說：「嘉樂諗中文名，我諗英文名。」
原來盈盈拍《老表》時已懷孕，她說：「當時一個月，我唔敢講畀人知，所以跣低、被車撞，都係自己就住嚟做，安仔同監製知道都覺得好內疚。」至於祖藍被視為福將，他否認說：「唔係，全劇演員都係福將。」
有傳祖藍頂替林峯演《食為奴》，《老表》及《食》劇監製黃偉聲表示由於林峯、吳卓羲和鍾嘉欣度不到檔期，《食》劇改由黃智賢、張繼聰和蚊蚊演出，據悉細細粒陳嘉佳和鬼妹陳明恩亦會在劇中演宮女和俄羅斯人。
採訪：黃曉妍
攝影：黃偉雄