前曼聯翼鋒簡察斯基認為，目前曼城所踢嘅足球比佢哋嘅同市宿敵更加接近曼聯嘅傳統，呢位前俄羅斯國腳亦都相信，如果紅魔鬼喺呢場曼市打吡輸波嘅話，今季英超就已經唔使再爭落去。

簡察斯基係曼聯喺1994年贏得英超同埋英格蘭足總盃嘅功臣之一，紅魔鬼當年有佢同傑斯雙翼齊飛，成隊波喺聯賽入80球，多過亞軍嘅布力般流浪17球。不過，簡察斯基認為由哥迪奧拿帶隊嘅曼城，同以前嘅曼聯更加相似。簡察斯基話：「依家嘅踢法根本唔似費格遜領軍果陣，我哋不嬲都有翼鋒，依家踢翼嘅反而係曼城，你睇佢哋入幾多波。當日費Sir退休用傑斯咪好囉，佢喺曼聯大，乜都熟悉，球迷又支持佢。如果用傑斯嘅話，成績至少會比用雲高爾、莫耶斯好吖！」

簡察斯基亦都話：「如果曼聯喺兩循環聯賽都贏曼城，咁就有好好嘅機會贏英超。但如果佢哋禮拜日輸波就玩完喇，無機會喇。落後11分嘅話已經無可能，因為差距太大喇！」

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM