《悍戰太平洋2：起義時空》（PACIFIC RIM: Uprising）噚日喺太古城舉行首映，有份演出嘅張晉同黃愷傑當然有現身，佢哋仲為太古城中心間新戲院進行開幕儀式。方力申、張崇基同囝囝、顏子菲同吳雲甫等亦應邀出席。

張晉話今次係首次參與荷李活演出：「我喺戲入面做將軍，唔使打，可能想留返下一集先打。第一次參與荷李活電影，平時聽嘅同經歷嘅真係有分別，嚟緊下一齣電影都會係講英文嘅，睇下自己可唔可以應付得嚟。」問佢會唔會有意進軍荷李活？張晉話：「點都要拍好自己嘅電影，人哋點解會搵你，就係因為做好自己，無論係做電影定係做人都係咁，唔好求鬼其做咗就算。」佢仲話有啲細片傾緊，自己都想拍啲要打嘅電影：「不過今次都幾開心導演揀我做唔使打嘅，證明我嘅演技都有人留意，好鼓勵。」

張晉仲話希望將自己嘅功夫帶到去荷李活，想拍啲動作片俾外國人睇：「動作電影係全世界都比較容易接受嘅肢體語言，冇語言限制。」

黃愷傑亦係首次參與荷里活電影，佢係戲中飾演新一代機甲獵人駕駛員：「好榮幸，呢齣戲亦係我第一次為荷李活電影試鏡，當初都唔知係拍呢套戲，淨係知道佢哋想搵識講英文嘅男演員。」

黃愷傑仲話原本因為時間關係，導演想安排視像電話試鏡：「但係我覺得面對面會比較好，於是就問導演喺邊度，知道佢係喺澳洲，我就即晚飛去澳洲同佢見面。」記者笑指佢咁有誠意所以獲得拍攝機會，黃愷傑話：「第一集我已經係fans，自己好鍾意呢套戲。因為個角色係保護地球，所以一定要練到好大隻，自己都未試過要操得咁勁，真係標晒冷汗又嘔，不過都好值得。」

趙雅芝囝囝黃愷傑有份主演《悍戰太平洋2：起義時空》，對於大陸票房大收，佢話：「當然好開心內地票房好理想，希望可繼續有好嘅成績，香港呢兩日做優先場，我聽發行公司講賣得唔錯，多謝咁多香港人支持，香港29號上畫，希望到時多啲觀眾入場支持，見到我角色都鍾意。」

精選娛聞，喺晒《娛果》
http://fb.com/appledailyent