大陸股市重傷後升番，散戶要食定驚風散入市，但有散戶喺《香港討論區》睇好內地房產股，話會爆升，叫大家估吓邊隻大陸地產股會率先跑出，結果中國海外（688）、瑞安房地產（272）同世茂房地產（813）叮噹馬頭，同樣有17%嘅網友支持；雅居樂（3383）就有11%。

中海、瑞房世茂看升

網友Enjorlras話睇好中國海外，「淨係染藍概念都有得炒啦！加上個股票編號咁好意頭，梗係會升啦！」
Beshing覺得瑞房都唔錯，「睇瑞房被納入摩根士丹利資本國際（MSCI）指數就知道掂喇！」瑞房今日正式納入MSCI指數，即噚日指數基金要吸納瑞房，所以即使大跌市，但瑞房亦由開市時跌7.42%，到尾市抽上，收市時跌幅只係0.56%；相對中海及世房跌成5.85%及4.57%，算冇乜跌咯。
Shaw就估雅居樂有機會炒上，「佢啱啱喺海南島買咗塊地，發展旅遊消閒區，再加上有龐大土地儲備……」
但Joelvlvicky就唔多覺內地房產股會爆上；Jackylam8231笑住話：「中國地產（1838）有機會逆市向『下』，跌穿招股價，跟住可能被人極速私有化㖭！」
中國海外嘅股價，自07年以來就跌咗近兩成，噚日收報7.88元，瑞信評為「中性」，目標價係7.8元──即睇佢個價仲會跌。
瑞房就好啲，雖然大摩都係評「中性」，但目標價定喺7.7元，嚟𠵱家7.1元個價，仲有8.5%水位。