《溏心風暴》系列有風光時候，大家族明爭暗鬥，啱晒香港家庭主婦睇，不過翻生又翻生，嚟到第3輯倒模咁嘅模式，真係聽到都悶……

睇番轉頭，以往兩輯集集拋金句、口頭禪，好似「人在天堂、錢在銀行」、「唔使驚、荷媽喺大廳」呢類。而《溏心3》話明係同一個模式，離唔開都係金句啦，尤其係由一班資深演員講出嚟，特別令人「印象深刻」…好似夏雨就有呢句「急事就慢做，慢事就急做，事急則緩，事緩則圓」，阮兆祥就講「有我Like哥、包你真Like，唔係呃Like」，特別提提，呢個「Like」字用到濫，幾乎每人都會講一句「俾個Like你」…普通人邊個會講得出口？

另一款金句模式就係同一組字重覆用，好似關菊英就重覆用「堅離地」三個字，組成一句「你哋嘅堅離地，走去堅尼地城，仲係去錯舖喎！真係堅離地得可愛。」司棋姐就有「見我身軀肥大，就知我胃大、肺大、氣量大。」

如果要喺倒模中搵啲新意，就有「呢度唔係XX」系列，司棋姐早兩星期就講過一句「呢度唔係法庭，你就當呢度係醫院，呢個計劃已經宣布死亡。」聽落熟口熟面，無他嘅，因為結構係跟舊時嘅「呢度唔係法庭，唔需要證據，我對眼就係證據！」

更多娛聞，喺晒《娛果》
http://fb.com/appledailyent