做得手機開機相，主角一定對手機持有人極度重要，但相信大家估唔到，青年民建聯主席顏汶羽一開機見到嘅，唔係佢太太，而係民建聯前立法會議員陳鑑林。「我每日都會望住諗下；如果係鑑林，佢會點諗呢個議題或政策？」嘩，顏太會唔會呷醋㗎？

30歲嘅顏汶羽早前自薦加入新成立嘅青年事務發展委員會，已經面咗試，過唔過關仲未知，但若大吉利是要食檸檬，佢都知道係咩「滋味」！喺嶺南大學修讀經濟、研究公共政策嘅佢，大學二年班時搵暑期實習，除咗喺香港政策研究所返工，亦想由下而上推政策，申請咗民建聯實習計劃，「但佢哋唔收我，哈哈！」

拒收原因好簡單，因為未能連續兩個月實習，以為好夢成空，點知收到陳鑑林議員辦事處來電邀請做intern，塞翁失馬卻遇伯樂。汶羽喺翠屏邨同德福花園，即係鑑林嘅九東地盤長大，難怪被相中，除此之外佢引述鑑林話，「你讀政策研究卻肯做地區工作，好難得」。

佢其後幫鑑林做兼職助理，返工多過返學，07年為現已為副局長嘅陳百里喺區議會助選、2011年到佢去馬觀塘區佐敦谷選區而得咗，鑑林鼓勵佢繼續進修，結果完成碩士課程後宜家攻讀博士。佢嘅一段姻緣亦同民建聯有關，大學時代已認識嘅太太畢業後喺民建聯返工，咁啱佢當時係副發言人，近水樓台擦出愛火，2013年共諧連理。

回想當初，汶羽大學前都冇諗過從政。身為獨子嘅佢自稱細個「好摺」，呂郭碧鳳中學就讀時唔算勤力，成績普通，「嗰時政府宣傳成日話『求學不是求分數』，我好鍾意，成日同阿媽講！」高中時則係羽毛球校隊，讀大學時冇上莊仲好黐家，頭一年必須住hall，但佢每逢假期前已經飛奔返屋企，名副其實歸心似箭。