靚太不同闊太，靚太唔易做，無論女人產前多麼的女強人，萬大事都運籌帷幄。產後馬上知道，不光是體形磅數在控制之外，很多人事關係，都是非預算地發生很多意外。像怪雞大風吹倒新蒲崗一幅竹棚，幾乎全個東九龍隨即癱瘓。有些事情，難以綵排，只能事後檢討，避重就輕，不讓同樣的錯誤再次發生。
靚太養孩子，一心希望孩子又靚又聽話。環顧家裏兩個不同年齡的「孩子」，大家都是禿頭，長個小肚腩，脾氣時好時壞，雙方溝通困難，令你哭笑不得。但靚太仍會認定，兩個不能容忍的個案中，小的那個還是得你滿分的歡喜，愈壞愈靚，愈扭計愈叫你疼惜。至於大的那位，對了，就是你那個可憐夾大唔透的partner，你總是找他碴子，左右看都礙眼，嫌他阻碇樣衰，跟他霎氣當食生菜。你圓滑地自辯說，這樣好證明你專一，一條心，不會一腳踏兩船。你立場堅定，既然主動棄船，就不要管那條破船出航後會泊向哪個碼頭。男伴醒目的話，會有個二號碼頭做緊急後備。靚媽心水清，得一就夠，不想二，麻煩會減省很多。

給孩子自由很重要，那個大孩子被萬千寵愛在一身那個小的搶了龍頭位置，頂無癮。外面母愛氾濫的女子數不在少，一個願呵，一個願嗲。就是這樣，家裏有了「第三者」，接着自然有「第四者」，兩組關係難稱得上平等，那邊再輕一點比較好。可是，成年人要做感情上的瘦身何其難。靚太和靚媽角色有衝突，唔易做，電視劇都有得你睇了。這次過了火位，下次依然會犯錯。有得重頭來過的話，靚女未必肯升級做靚太靚媽。小男人更加不用說，只會揀靚女。