韓劇《玫瑰人生》已故女星崔真實於2008年於住所浴室上吊自殺，終年39歲。而崔真實一對仔女就與外婆生活，不過崔俊熙於上月突然喺facebook爆seed，以千字文控訴受到外婆暴力及精神虐待，更坦言自己患上抑鬱症及曾企圖自殺。隨後警方介入調查，不過警方於本月12號以外婆無虐待崔俊熙嫌疑而終結案件，而崔俊熙上周三突然表示希望同外婆和解，更被韓媒影到與外婆現身首爾家庭法院。

崔俊熙今日喺Instagram上載新相及留言，疑似係向外婆道歉，虐待事件似乎告一段落。崔俊熙寫道：「呢段時間，我只係考慮到自己，認為只有自己先係最辛苦，忽略咗其他人嘅想法、感受，拖到依家先道歉，真係好對唔住。」崔俊熙又指自己將會打起精神、咬實牙關生活落去。崔俊熙又似乎以過來人身份提醒網民：「唔好忘記家人係世上最珍貴嘅存在。」