新驚慄電影《古宅》今日喺深圳舉行首映活動，主演嘅朱茵同張繼聰聯同導演等出席，現年46歲嘅朱茵與38歲嘅張繼聰，（竟然）喺片中飾演一對母子。冇錯，係母子！

朱茵話：「參與這部電影不只是挑戰也是訓練，但演員應作多點嘗試。在當初知道阿聰做我的兒子時，我也是不相信，怎麼演呢？不過裡面有化特技妝，我就不用擔心，也很高興跟阿聰合作。」至於「囝囝」阿聰就笑言一得知係演母子，就知道呢套係恐怖片，不過佢話如果要同朱茵演情侶，應該會更恐怖。阿聰仲話，今次係首度同朱茵合作，所以當初收到邀請係好開心嘅。

被問到對邊場戲最深印象，阿聰話有一幕讀信場面，令佢回想到自己對媽咪唔係幾好，而佢更因為投入角色，不禁流淚。而朱茵就話邊拍邊諗起寶貝女黃鶯，佢話：「我幻想她將來真的像戲中的新中這樣對我，我真的會很難過也太難受，幸好《古宅》是在香港拍攝，每天拍完回家我都可以抱抱女兒，也跟老公撒撒嬌，感覺就不太孤單，而且電影給我的經歷，也教我要好好珍惜身邊的人。」

朱茵仲話，自己會將媽咪教導自己嗰一套用喺個女身上，等囡囡做完功課，陪對方傾偈，又會提醒老公黃貫中（Paul）要直接同個女講「我愛你」，要用行動表示。阿聰就話自己拍完《古宅》後好驚，所以對子女更好，佢話：「會常親吻兒子，但面向我的父母，要表達情感就很難，因為很難跟爸說要擁抱吧！他聽我忽然這樣說，可能以為我工作是否出現問題，但我都會嘗試去好好表達自己的情感。或者在不用工作時，就必定回家吃飯，留在家的時間也長一點。」阿聰仲講咗同太太謝安琪嘅相處之道，佢話老婆教佢：「婚姻跟拍拖不一樣，都不會像從前那麼浪漫，因為兩個人在一起要照顧小孩子，處理生活當中很多事情，但感情這回事亦關乎心態問題，所以太太教我常常回想第一次見到她的感覺，之後跟她去吃飯看電影，就嘗試用第一次見她的心情去拍拖，保持這種心態，讓感情長青。」

另外，講到過中秋，朱茵話會同屋企人食飯做節，之後會同囡囡一齊出外賞月，更認為呢個習慣好重要；而阿聰就唔使開工，屋企仲會掛埋燈籠，加上囡囡已經大個，識得攞住燈籠四圍走。

精選娛聞，喺晒《娛果》
http://fb.com/appledailyent