韓國男團MBLAQ嘅30歲成員G.O今年年頭認戀曾演出《那年冬天風在吹》、《憤怒的媽媽》嘅24歲女星崔藝瑟，兩人拍拖8個月感情好穩定，

而G.O已於上月退伍，佢亦轉型做網上Afreecatv BJ主播，佢噚日趁白色情人節呢個日子，仲唔擔心粉絲呷醋，邀請埋女友一齊做節目，仲介紹對方為「我嘅女友崔藝瑟」，佢哋喺現場奉旨晒恩愛，女友仲主動獻吻錫錫G.O。G.O同時亦自爆同女友相戀經過，佢話喺一次朋友嘅聚會上認識崔藝瑟後，開始主動聯絡女方，又約佢出街，最後順利追得美人歸。崔藝瑟亦大讚男友好體貼同埋照顧自己，兩人大晒幸福，令唔少網民羨慕不已。

G.O喺演藝圈條路唔多順暢，佢於2007年曾以男女R&B組合TYKEYS出道，不過遇着公司倒閉致團體解散。到2009年時佢就以MBLAQ團隊出道，當時因為打著韓國天王Rain親手打造嘅威勢，所以出道後人氣不俗，但之後後繼無力，加上李準、天動等退團，經理人公司更破產收場，早前G.O搞見面會都要自掏腰包請粉絲，不過自從G.O本月加入做主播行列之後，佢短短十日已成為該平台搵錢最多嘅網上主播，認真犀利。

更多韓流，喺晒《娛果》
http://fb.com/appledailyent